БОГОЯВЛЄНСКЕ ПОШВЕЦАНЄ ОБИСЦОХ ЗОЗ СЕМЕЙСТВАМИ
Пошвецанє обисцох почало на памятни дзень Собору св. пророка, предтечи и Крестителя Йоанна.
того року як то и звичай почало на памятни дзень Собору св. пророка, предтечи и Крестителя Йоанна, 20. януара 2016. року. Фотоґрафия з лївого боку представя овиковиченє єдного такого пошвецаня на Свиленим шоре ґу Kотю, у фамелиї Раґайових, Йовґена и Натали зоз унучку Єлену.
Модляци обряд пошвецаня
Сам модляци обряд пошвецаня випатра на шлїдуюци способ: Священїк облєчени у подряснїку и зоз епитрахильом, а у руки благословяци крест и кропидло уходзи до обисца и здравка зоз християнским поздравом: Слава Исусу Христу!, а домашнї одздравкую: На вики слава!
Звичайно у преднєй хижи на столє стої танєр зоз пошвецену богоявлєнску воду. Паноцец станє обрацени ґу Образом кед их єст вишацих на мурох, лєбо на восток, лєбо у напряме парохиялней церкви и шпива перши возглас: "Благословени Бог наш, навше, тераз и вше и на вики викох". Домашнї одвитую: Аминь!, а потим священїк шпива тропар Богоявлєня:
Тропар Богоявлєня
Кед ше Ти, Господи кресцел у Йорданє, обявело ше Тройцово кланянє: бо родительов глас шведочел за Тебе, наволуюци Це любеним Сином; а Дух у подоби голуба, потвердзовал правдивосц Слова. Христе Боже, котри ши ше явел и прошвицел швет, слава Тебе.
и кед дошол до конца мочи кропидло до швеценей води и крестообразно кропи шицки мури на шицки штири боки швета, а на концу и шицких присутних домашнїх по старосним животним возросту, з тим же ше першенство дава мужескому полу, як ношительом семейственей заєднїци. При кропеню обисца и їх членох єрей виповеда слова: "Благослови ше и пошвецує дом тот, и шицки у нїм жиюци, у мено, Отца, и Сина, и Святого Духа. Аминь".
