Виронаука

Вироучованє младих у вири и традициї Церкви

Виронаука

Тото цо их ми вироучителє нє можеме у школи научиц, то молитвеносц и церковносц. Молитва як каждодньови контакт з Господом, то искуство хторе ище вельо важнєйше од теорийного знаня. Научиц чувствовац Бога у своїм каждодньовим живоце и нєпреривно му дзековац за його потримовку у живоце, то на годзинох виронауки нє можлїве.

Нєпреривна повязаносц з Богом у молитви ше учи дома од малючка, а то у рукох каждей мацери або баби. Нїч нє менєй важна и церковносц, а то поряднє одходзиц до Дому Божого на стретнуце з Господом як и приманє Святих Тайнох споведзи и причасци, хтори вєдно зоз Покаяньом очисцую нашо души и отримую нас вше порихтаних пойсц ґу нашому Нєбесному Отцови. Розвиц церковносц при дзецох, то тиж припада воспитованю, хторе ше учи у родительским доме.

Окрем настави виронауки, паноцец Михаил и я ше трудзели порихтац рижни брацкованя, вилєти и путованя, тетарални представи з вирскима змистами, хтори нам шицким останю у прекрасних памяткох. Два путованя вироученїкох до Швайцарскей, два раз зме были на морю у Чарней Гори и у Ровиню, вецейраз зме вилєтовали на Фрушкей Гори, паломнїцства до Водици, обиходзели зме манастири и пратковали у церковней сали.

Я ше дзечнє будзем здогадовац велїх пробох, кед зме 2001. року рихтали тетарлну представу «Швичка» и велїх приємних дожицох на самих годзинох виронауки, кед ме мойо школяре зоз своїм знаньом, або одличнима питанями о хторих зме вец длуго дискутовали, наисце обрадовали.

Пред тринац роками, кед сом у Дюрдьове превжала виронауку од пароха о. Йоакима Холошняя, тот предмет першираз уведзени як виборни у школи; єдна годзина до тижня у першей класи, док други класи и далєй приходзели на парохю слухац виронауку. У шицких осем класох зме мали коло 120 школярох, а нєшка ше тото шумне число зменшало на коло 70 дзеци.

У своєй вецейрочней пракси мушим замерковац же ше нє зменшало лєм число дзецох, алє ище баржей и їх интересованє за виру и виронауку. Понеже виронаука виборни предмет, школяре нє доставаю оцени, та анї нє маю мотив потрудзиц ше на виронауки дацо запаметац, а єдна годзина до тижня наисце мало же би ше им Слово Боже "насмаковало".

Кед их з оценьованьом нє мож придобиц же би дацо запаметали, вец би кажда годзина виронауки мушела буц так атрактивно порихтана же би ше ванрядно заинтересовали, та на таки способ дацо и запаметали. То заж тиж вше чежше, прето же дзеци нєшка презасицени зоз медиями и зоз чкодлївима видео-бависками.

Наташа Холошняй

Скорейша вироучителька

Гоч виронаука виборни предмет, вон наисце без конкуренциї найважнейши у одрастаню и школованю каждого дзецка.
— Наташа Холошняй

Терашнї вироучитель

Наставнїк виронауки у Основней школи Йован Й. Змай

Слава Исусу Христу!

Данил Задрепко

Наставнїк виронауки

Кед ми дошлєбодзице, представим ше насампредз. Мено ми Данил Задрепко, и парохиян сом Дюрдьовски. Накеди сом дипломовал теолоґию у Ужгородзе, достал сом намесценє наставнїка виронауки у Основней школи Йован Й. Змай, од Лїта Господнього 2015/16.

Викладам виронауку дзецом грекокатолїцкого виросповеданя од першей по осму класу и шицкого их єст трицец седмеро (37), з тим же ше число нєпреривно злєгка гомба пре причину сталней пременки места жица фамелийох. Єдни одходза до городу, други ше заж врацаю на валал.

Цо ше дотика самей наставней градзи, вона представя основне и сущне ученє Церкви: Поняце Бога, Цо то Церква, Закон Божи и тому подобне. Понеже виронаука виборна наставна дисциплина, вона ше нє оценює, цо по моїм думаню и у шоре, бо вира на концу-конца особна ствар каждого.

Вельке виволанє и одвичательносц нас катихитох праве заохоциц дзеци до цо частейшого приходзеня на богослуженя и так их випровадзац на драгу християнского живота и воцерковйованя.

У тим процесу духовного одрастаня нєсовершенолїтних дзецох улога родичох заж лєм пресудна, а як найлєпша и плодоприношаца педаґоґийна метода то їх ВЛАСНИ ПРИКЛАД, власним дзецом, кед родичи пошлїдовательно, з нєдзелї на нєдзелю почитую Дзень Господнї и водза рахунку нє хибиц на нєдзельним Євхаристийним собраню общества.

Єдино так ше мож сподзивац же порядне ходзенє на Службу Божу постанє нє лєм механїчне навикнуце алє насущна потреба и жажда при їх дзецох за цали їх живот хтори пред нїма, а на цо вас з тей ту нагоди сердечно поволуєм.

Швичкаре

Дюрдьовски швичкаре — служителє при Служби Божей

Вельке допринєшенє краси, святочносци и вецейлюдней нащивеносци нєдзельней Служби Божей, даваю ДЮРДЬОВСКИ ШВИЧКАРЕ. Велї ґенерациї и велї хлапци починаюци приблїжно од трецей класи основней школи, та по осму, були члени Швичкарскей ґрупи.

Було, слава Богу и прекрасни винїмки, же дзепоєдни швичкаре свойо швичконошаце служенє нє занягали анї по законченю основношколского образованя, алє предложели тото свойо шумне и каждей похвали достойне звикнуце, виполньовац и у своїм штредньошколским возросту.

Одправяюци иподияконске служенє насампредз на Архиєрейских Службох Божих, лєбо на Литургийох найвекших наших християнских шветох.

У терашнєй хвильки ШВИЧКАРСКУ ҐРУПУ творя осемцме хлапци, чийо фотоґрафиї приложени у ґалериї нїжей.

Предсидатель: Александер (Саша) Циковец

Члени швичкарскей ґрупи

Фотоґрафиї наших швичкарох

Як постац членом Швичкарох

ДЮРДЬОВСКИМ ШВИЧКАРОМ може постац кажди кресцени член мужеского полу нашого церковного общества.

Таке свойо особне и нєспримушене намиренє треба же би сообщел предсидательови Швичкарох, лєбо гоч котрому другому члену швичкарскей ґрупи, а кед поглєдованє нового кандидата прейдзе през обсудзованє його поднєшеней кандидатури пред цалим колективом швичкарох на даєдней швичкарскей схадзки, вон будзе здушнє прияти до Швичкарского братства.