Молитвенїк "МИР ВСИМ"
Зоз архиєрейским благословом владики Крижевского + СЛАВОМИРА (Микловша), на саме Швето Рождества Христового по григориянским календарним стилу, 25. децембра, Лїта Господнього 2002. у Заґребе Дюрдьовскому церковному обществу дате допущенє за пририхтованє видаваня молитвенїка
на бачванско-сримскей рускей бешеди южно-славянских Руснацох.
Пририхтованє закончене о нєкратки пейц роки, так же Молитвенїк МИР ВСИМ, видруковани у новосадскей друкарнї "Стойков", у тисяч прикладнїкох конєчно шветлосц дня, а на радосц велїх такей файти духовного чтения жадних, збачел 2007. р.
О пресладки и вшещедри, Исусе, прим тераз тото мале модлєнє нашо, як цо ши приял два ґдовицово динарчки;
и зачувай нашлїдство Твойо од видлївих и нєвидлївих нєприятельох, од набегох цудзинцох, од хороти и гладу, од каждей нєволї и смертельней рани, и виратуй од будуцих мукох шицких, Тебе воскликуюцих: Алилуия!
- Молитвенїк ма 584 боки, видруковани є на кунстдруку, зоз твардима рамиками и златооциском на твари, хрибце и рикни.
- Ма два означуюци пантлїчки, а тексти збогацени и зоз даскелїма репродукциями иконох и векшим числом декоративних винєтох, заставками, инициялнима буквами и кончиками.
- На самим концу Молитвенїка єст и даскельо празни боки за особни записки, лєбо особни модлєня.
- Зоз своїм красним вонкашнїм естетским випатрунком здатни є и як прекрасни дарунок, окреме за християнски швета лєбо значнєйши духовни збуца (кресцини, Перша Причасц, Имени дзень, паломнїцки путованя и подобне).
