Лєм кус вецей як мешац хибело, же би ше, на Швето св. отца Николая (по юлиянским стилє), наполнєло 59 роки иєрейского служеня длугорочного новосадского пароха, о. Романа Миза.

Вчера, 13. новембра 2017. р. у 85.-тим року жемского "странствованя" зацихло дурканє шерца пошвеценого душпастира - священїка, а тиж и визначного публицисти и всестраного културного роботнїка у рускей заєднїци бачванско-сримских грекокатолїцких Руснацох, отца Романа Миза.

На правим боку приложена фотоґрафия богословских парнякох зоз студентских заґребских часох: длугорочного дюрдьовского пароха Йоакима М. Холошняя, хтори пред седем мешацами, тиж того одходзацого 2017. року, оддишол з того швета до Божей вичносци (на фотоґрафиї з лївого боку), и вельолїтного паноца пароха новосадского Романа Миза /на образним овиковиченю їх вирней дружби и парняцства зоз шпациру по идиличних єшеньских и з одпаднутим лїсцом покритих улїчкох на Горнїм городзе у Заґребе, з правого боку/.